Ciao zäme!
Motore mit grossem Hubrum fasziniered mich, sit ich i der RS glernt han, Saurer z fahre! Scho sit einige Jahr fahr ich au Zweirad. Nach mim Istand uf ere 125er hettis eigentlich e HD oder e Buell selle werde. Wo ich denn allerdings mal für e Probefahrt verbi gange bin, het de Verkäufer mir klar is Gsicht gseit, dass das nöd mim Budget entspricht! (S Geld wär do scho uf em Konto bereit glege!)
Druf han ich mich denn für e Ducati Monster entschide – glich viel Zäpfe, au en tolle Sound aber eifach en andere Winkel zwüsche de beide Zylinder… Spöter hets denn mal no e BMW K1200S gä mit gelb/schwarzem Leder vom „House of Leather“über de ganzi Töff – wahrschindlich hend de scho einige vo Eu a de Töffmess mal gseh…
Nachdem uf de Strass je länger je meh alli wend es Renne mit Isatz vom eigene Lebe mache , han ich mich entschiede, doch endlich mal e Harley uszprobiere – bi me andere Händler. Han e Heritage Softail und e Roadking Classic testet – letsteri für e hübschi Pässefahrt vo knapp 400km. Es isch traumhaft gsi! Ich han en tolle Tag chönne gnüsse und zu mire Verwunderig ohni mich alli foif Meter mit de Chnüschlifferfraktion müesse ume z ärgere!
Im Herbst han ich mir denn e neue RoadKing Classic bstellt. Mit der BMW bin ich sit de Probefahrt gar nümme gfahre (eigentlich au schaad). Letschti Wuche han ich mini RoadKing dörfe in Hünenberg bim Bixe go abhole und han sie grad chli usprobiert - eifach traumhaft!!! Jetzt suech ich natürlich no nach passendem Zubehör wie z.B. andere Töpf (evtl. REMUS). D Idee wär mehr Sound, aber so, das es no Buesse git und nöd grad Gericht und Ausweisentzug für 100 Jahre... Naja, schiint mer chli schwieriger z sii... Zudem mues denn no en neue Helm ane, aber de wett ich au no probefahre mit de Roadking - evtl. wirds en Shoei Neotec - isch aber no nöd entschide...
Natürlich sett ich au no mini beide andere Bikes verkaufe...
Ich freue mich über Tips und hoffe, Euch bald uf de Strass z treffe!
__________________
Old enough to know it better, young enough to try it again!
